LAOAG CITY – Indauloan ni Pres. Ferdinand Bongbong Marcos ti pannakaibunong dagiti 69 nga ambulansia para iti rehion uno kagiddan ti pannakaselebrar ti 107th Birth Anniversary ti amana a ni dati a Pres. Ferdinand Marcos Sr. ita nga aldaw, Setiembre 11.
Naammoan a kadagupan iti 69 nga ambulansia, 12 ditoy ket naipaay para ditoy Ilocos Norte kangrunaanna iti ili ti Paoay, Carasi, Vintar, Pinili, Dumalneg, Sarrat, Badoc, Nueva Era, Pasuquin, Solsona, iti siudad ti Batac ken ditoy siudad ti Laoag.
Malaksid iti daytoy, 17 nga ambulansia ti naited iti probinsia ti Ilocos Sur, 8 iti La Union idinto a 32 para iti Pangasinan no sadinno nga agbalor ti nasurok 2 a milyon ti tunggal maysa nga ambulansia.
Kadua ni Pres. Marcos ti asawana a ni First Lady Liza Araneta Marcos pakairamanan dagiti tallo nga annakda nga isuda Ilocos Norte 1st District Rep. Ferdinand Alexander Araneta Marcos, Joseph Simon Araneta Marcos ken William Vincent Araneta Marcos.
Nagatendar ti Thanksgiving Mass da Gov. Matthew Marcos Manotoc, Mayor Michael Marcos Keon, Mayor Albert Chua ken dadduma pay nga opisial ti probinsia.
Mainaig iti daytoy, kalpasan ti misa ket naiyuswat ti wreath laying ceremony iti Ferdinand Marcos Sr. Monument, pannakairubuat ti maikapito a Rice Paddy Art iti Mariano Marcos State University no sadinno a naitampok ti rupa ni Sen. Imee Marcos ken simple a programa iti Teatro Ilocandia.
Kabayatanna, inpannakkel ni Sen. Imee Marcos dagiti naggapoanan ti amana a nakatulong ti naruay a Pilipino.
