LAOAG CITY – Naiget a nagkedkedan ni Defense Secretary Gilberto Teodoro Jr. ti panawagan ti sumagmamano a negosyador a maminsan a lukatan ti peace talks iti communist group ken New People’s Army (NPA).
Iti maysa a seremonia ditoy Laoag City, Ilocos Norte idi Mayo 2, kuna ni Teodoro a saan nga umannugot iti aniaman a negosasion gapu kadagiti Pilipino nga addan iti kinakappia ngem dagiti rebelde ti mangriribok.
Nangiparuk-at ti panawagan dagiti dati a miembro ti exploratory team para iti backchannel talks kalpasan ti engkwentro idiay Negros Occidental a nakatayan ti 19 nga indibidual.
Basar kadakuada, dati nga immaboten a dandanin a naaddaan ti interim peace agreement ti gobierno ken CPP-NPA-NDF.
Nupay kasta, inpetteng ni Teodoro, ti pannakisarsarita dagiti rebelde ket arig panangipaay ti legitimacy iti “terorismo,” banag a saanna a maakseptar.
Inbatad ti Armed Forces of the Philippines a ti amin a natay ket armado ken nakirinnupak ngem inpetteng ti CPP nga adda dagiti sibilian kadagiti napapatay.
Gapu iti daytoy, nangrugin ti imbestigasion ti Commission on Human Rights tapno ammoen no nasurot ti international humanitarian law iti nasao nga operasion.
