LAOAG CITY – Naglikudan ni Atty. Donato Balderas, ti Department of Education Superintendent iti Ilocos Norte dagiti maibatbato nga alegasyon kontra kenkuana kas ti maipagarop a kinaunget na ken ti panagsasao na ti agkakaalas a sarita kadagiti empleado ti Department of Education.
Inbatad na nga ado dagiti makapaneknek a saan a naunget a tao ngem kas ama ti maysa nga ahensya ket adda dagiti mabagbagaan na ngem saanna pulos nga inaramid ti nagusar ti agkakaalas ken nadadagsen a sarita gapu ta ammo na no kasanu ti rikna ti masaktan.
Inadmitir na a kas naipagagangay nga adda dagiti gundaway a maingato na ti boses na gapu ta sigurado nga awanen ti mamati kenkuana no agtalinaed a naalumanay ti panagsarita na iti amin a gundaway.
Kuna na nga idi damo nga umay ditoy probinsya tapno idaulwan ti Department of Education ket ti immuna a pinanunot na ket ti maurnus ti interpersonal relationship dagiti empleado gapu ta mamati a no adda ti napintas a langen-langen ket makapagtrabaho da a nasayaat ken nasimpa ti panunot da nga agtrabaho.
Innayon na a kas ama ket awan dagiti pabpaboran na kadagiti annak no di ket patas amin a trato na kadakuada.
Malaksid iti maipagarop a kinaunget ni Balderas ket maak-akusaran pay nga adda ti illicit affairs da iti iti Assistant Schools Division Supt. ditoy probinsya.
Inpetteng ni Balderas a no public figure ket nakatutuk ti mata ti tao kadakuada ken saan da a matengngel wenno kontrolado ti panunot iti tunggal maysa aglalo ket nairanan a babai ti Assistant Schools Division Supt. ditoy probinsya.
Inlawlawag na nga iti opisina da ket masapol nga adda ti team-up da ken agtuntunus da no ania ti rumbeng a mapasamak iti maysa nga organisasyon.
Gapu iti daytoy, maymaysa laeng ti desisyon da no adda dagiti kalikagom da a maipatungpal iti organisasyon na ken saan a mabalin nga agsupadi da ti kayat a maaramid.
Kuna na pay a naipagagangay met ti panagkuykuyug da no adda dagiti atendaran da nga aktibidad wenno programa, nga isu ti mabalin a nagtaudan ti nasao nga alegasyon.
