LAOAG CITY – Naideklarar ti pito nga indibidual ti natay, karaman ti agtawen 14 a suspek, idinto a 23 ti nasugatan kalpasan ti napasamak a pammaltog iti maysa a pagadalan iti ruar ti Bangkok Thailand.
Napasamak ti pammaltog idiay Debsirin Nonthaburi School iti Bang Kruai district, Nonthaburi province idiay Bangkok.
Ti suspek ket naamoan nga agtawen 14 a barito ken estudiante met laeng ti nasao pagadalan no sadinno ket inaramatna ti maysa a 9mm a paltog a kukua ti lolona.
Basar kadagiti otoridad, sakbay ti panangturong ti suspek iti eskuela ket immuna a kinettel ti suspek ti biag ti lolona iti pagtaenganda. Ket kalpasan iti daytoy, simrek ti suspek iti pagadlan ket ditoyen a nagpaputok daytoy ti namin-26 a daras.
Gapu iti daytoy, natay ti pito nga indibidual, pakairamanan dagiti 3 a mangisursuro, 2 nga estudiante ken ti lolo ti suspek. Kalpsan met ti inaramidna a krimen, kinettel ti suspek ti bukodna a biag.
Kabayatanna, segun iti Department of Foreign Affairs (DFA), awan ti nairekord a Pilipino a nairaman iti insidente.
Mainaig iti daytoy, agtultuloy ti panagimbestigar dagiti kameng ti Royal Thai Police ti motibo iti likod ti nasao a pammaltog.
