LAOAG CITY – Umabot iti 78 a tattao ti natay kalpasan ti drone strike iti maysa a moske iti Darfur region idiay Sudan.
Ti panagatake ket napasamak iti ciudad ti el-Fasher ket naitudo nga akin-aramid ket ti paramilitary Rapid Support Forces (RSF) ngem saan met pay nga inako ti grupo ti panagraot.
Naamoan a ti Rapid Support Forces ken ti militar ket addaan dagiti engkwentro da wenno ti civil war iti nasuroken a dua a tawen.
Iti impormasyon, ti paramilitaries ket adda iti ground gapo iti gagem da a naan-anay a makontrol ti el-Fasher – ti kakaisunan a lugar iti Darfur ken isu ti pagnanaedan ti nasurok 300 a ribo a sibilyan a maip-ipit gapo iti rinnubak.
Inbatad ti maysa a residente iti lugar a ti panagatake ket napasamak kabayatan ti panagkakararag dagitoy a dagus a nakatayan dagiti dinos-dosena a tattao.
Malaksid nga adda ti 78 a natay ket agarop met 20 ti nasugatan ken agtultuloy ti panagbirok da kadagiti posible a napupok wenno nagaburan kadagiti narpuog a pasdek.
Kabayatanna, kinondenar met daytoy ti Council on American-Islamic Relations (CAIR), ti kadakkelan a Muslim civil rights ken advocacy organization idiay Sudan.
Inawagan ti grupo kas “evil war crime” ti panangatake iti moske a pagkararagan dagiti tattao.
