LAOAG CITY – Kinumpirmaran ni Mr. William Ulep, ti Municipal Agriculturist iti ili ti Bacarra nga adda ti naparti a maysa a baboy ti nakumpiskar da nga aggapo iti ili ti Vintar ken maipan kuma iti Barangay Cabaroan, Bacarra.
Segun kenni Ulep, daytoy ket babaen iti entrapment operation kalpasan nga adda dagiti report iti ASF Task Force manipud kadagiti concern citizens.
Rumrumuar a ti nasao a karne ket umabot iti 84 a kilo.
Inlawlawag na a basar iti palawag ti natiliw a naggandat a mangiserrek ti karne ket ibunong na kas ayuda ken ipauraga na.
Nupay kasta, inpetteng na nga anyaman a rason ket saan a mabalin a makastrek nangruna ket aggapo iti red zone ken kas panangliklik iti ASF.
Mainaig iti daytoy, kunana a kalikagom da a mapagtalinaed nga awan ti ASF iti nasao nga ili.
Kabayatanna, inbatad na nga agtultuloy ti naiget a panagmonitor da tapno maliklikan ti ASF.
