LAOAG CITY – Umabot iti siyam a tattao ti natay idinto a 25 a sabsabali dagiti nasugatan iti nadamsak a mass shooting iti maysa a pagadalan iti British Columbia idiay Canada.
Kinumpirmaran ti Royal Canadian Mounted Police a siyam ti biktima iti pammaltog idinto a ti suspek a gunman ket nabirukan met nga awanen ti biagna ken mapapati a “self-inficted” ti sinagaba na a sugat.
Basar iti report, nailadawan iti naiparuk-at nga alert a ti nasao a suspek ket maysa a babai a naka-dress ken agmaris ti brown ti buok na.
Innem kadagiti biktima ket nakita iti uneg ti Tumbler Ridge Secondary School, dua met ti narekobre iti asideg ti maysa a residential property ken maysa ti pimmusay kabayatan ti pannakaitaray na iti ospital.
Kalpasan ti krimen, napaserraan ti Tumbler Ridge Secondary School ken Tumbler Ridge Elementary School iti uneg ti makalawas.
Mainaig iti daytoy, indanun ni British of Columbia premier David Eby ti pannakipagladingit na iti pamilya dagiti biktima iti nakaam-ames a trahediya ken inpasigurado na ti suporta na para kadagiti apektado a komunidad.
Kabayatanna, sinuspenso ni Canadian Prime Minister Mark Carney ti panagbiyahe na idiay Germany tapno agatendar koma ti Munich Security Conference kalpasan ti napasamak a pammaltog iti British Columbia.
