Inpakaammo ni Mayor James Bryan Alcid ti pannakaipaay ti 80 a lugan para kadagiti 80 a barangay ditoy siudad ti Laoag para iti pagsayaatan dagiti tunggal umili.
Inpannakel daytoy ti Mayor gapu ta ti administrasionna laeng ti nangkabaelan a mangipaay kadagiti nasao a lugan.
Inbatadna a naaprobranen ti gakat a mangipalubos ti pannakabusbos ti pundo para ti nasao a proyekto.
Kinunana a dakkel a pagyamananna dagiti kameng ti Sangguniang Panlungsod gapu ta ti panangaprobada ti mangipakita ti naiget a panagsuportada ti nagduduma a programa ti local a gobierno.
Malaksid iti daytoy, kinuna ti Mayor a sumurok kumurang 91 million pesos ti nakaipalaon ti appropriation ordinance.
Innayonna nga adda pay dagiti sumaruno a proseso a pagdalanan daytoy kas iti bidding no sadinno a daytoy ti mapili a paggatanganda ti lugan ket isunto ti pannakaibunongna.
Kabayatanna, mamati ti Mayor a dakkel daytoy a makatulong gapu ta daytoy ket mausar iti nagduduma a banag kas iti pannakaikabil ti ospitl ti maysa a residente, pagluganan dagiti residente no adda dagiti aktibidad ti gobierno ken nagduduma pay.
