LAOAG CITY – Natiliw ni Rodel Agbayani, traysikel driver, naasawaan ken residente idiay Barangay Naglicuan, Pasuquin, Ilocos Norte kalpasan a nakumpiskaran iti maipagarop a maysa nga heat sealed sachet a naglaon ti maipagarop a shabu ken maysa a granada.
Malaksid ti daytoy, maak-akusaran pay ni Agbayani ti maipagarop a pinangramrames na ti syuman na a babai.
Immunan nga inlawlawag ti suspek iti Bombo Radyo a bayat a matmaturog da iti anak na a lalaki iti kwarto da ket adda dagiti napan a pulis ken maipagarop nga inruwar, pinagpakleb ken pinosasan da lattan.
Segun kenkuana, nasdaaw idi nakita na nga addan ti granada iti abay na ken uray ti naala a maipagarop a shabu ket inpetteng na a saanna a kukua.
Immunan nga inadmitir ni Agbayani a binuong na ti figurine da gapu ti pungtot na ti syuman na kalpasan a saanna a kayat ti agawid idiay Pangasinan.
Inpetteng na a pagaw-awiden na idiay Pangasinan ti siuman na a babai tapno maliklikan ti aniaman a tsismis kangrunaan na ket awan adda dagiti assawa da idiay abroad.
Inpasingked na nga awan ti kinapudno na ti alegasyon a mol-molestyaen na ti siuman na.
Mainaig iti daytoy, inlawlawag ni Police Chief Inspector Roldan Suitos, chief of police ti nasao nga ili nga adda ti nagreport kadakuada a maysa a babai a maipagarop a biktima ti panagmolestya.
Gapu ti daytoy, nagturong da a dagus iti Barangay Naglicuan iti ili a Pasuquin ket bayat ti panangbirbiruk da nagreport kadakuada a biktima ket adda nangngeg da nga agsangsangit ket agriruaw a babai.
Iti panagsirip da iti balay ket nakita da ti maysa a lalaki a binigbig na a ni Rodel Agbayani a nakabrief laeng ken adda iggem na a granada.
Ti biktima nga agtawen iti 23 ket syuman ti biktima ken ti ina na ket adda idiay abroad iti agdama.
