LAOAG CITY – Agsursursur ti Child Rights Network iti nagduduma a lugar ditoy pagilyan tapno ilungalong da ti kalintegan dagiti ubbing.
Inlawlawag ni Mr. Romeo Doneto a iti Child Right Network (CRN) ket maysa nga alliance dagiti organisasyon a mangilunglungalong iti kalintegan dagiti ubbing.
Inbatad na a kayat da ti makaala kadagiti porma ti legislatura babaen kadagiti paglintegan a mangilungalong iti interest ken kalintegan dagiti ubbing.
Kinumpirmaran ti CRN nga iti inyuswat da a survey kadwa da ti gobierno mainaig ti panagabuso kontra kadagiti ubbing ket naamoan a maysa iti kada lima nga ubbing ket nagreport a nagbalin da a biktima iti sexual violence ken 30 a porsiento kadagitoy ket narames.
Nupay kasta, inbatad ti CRN a ti problema iti agdama a paglintegan ditoy pagilyan ket ti agdama a tawen ti statutory rape ket 12 a maibilang a kababaan iti intero a lubong.
Innayon ti CRN a masapol a maipangato iti 16 ti tawen iti statutory rape isut gapuna nga ituloy da nga ilungalong ti gakat para iti daytoy intono 18th congress.
