LAOAG CITY – Nagtalinaed ti takder ti simbaan katolika nga awan ti iyendorsar na da a kandidato para iti May 13 elections.
Daytoy ti inpasingked ni Father Ronie Pillos, ti Chairman iti PPCRV wenno Parish Pastoral Council for Responsible Voting ditoy probinsya.
Kuna pay ti padi a saan da nga agawat ti aniaman a donasyon nga ited dagiti kandidato wenno politiko para kadagiti programa ti simbaan iti daytoy panawen iti eleksyon.
Inadmitir na a mabalin nga adda dagiti politiko a nangipaay ti tulong na iti pannakatarimaan dagiti simbaan iti kallabes ngem inkalentagan ni Father Pillos a saanpay idi a panawen ti kampanya wenno eleksyon.
Kabayatanna, inbalakad ni Father Pillos kadagiti botante a masapol a suruten ti konsensya no siasinno ti rumbeng nga ibotos ken agkararag to sakbay nga agbotos intono Mayo 13.
