LAOAG CITY – Natiliw dagiti dua a tattao a nagsusugal ti “lucky 9” iti maysa a minatay iti Sitio 3 Brgy. Barong iti ili ti Dingras kalpasan a naaktuan dagiti kameng ti PNP Dingras.
Daytoy ket kalpasan a nakaawat da ti impormasyon manipud iti maysa a concerned citizen mainaig ti aktibidad iti nasao a lugar.
Nabigbig dagiti natiliw a da Barangay Chairman Edilberto Gudoy y Cabel, agtawen ti 64; Felix Doropan y Mateo, agtawen ti 56, naasawaan, mannalon ket residente iti nasao a lugar.
Agtultuloy met a mabirbirok da Lorenzo Butay, Charito Gudoy agpada a residente iti nasao a barangay; Jenelyn Castillo a taga Brgy. Raraburan ditoy siudad ti Laoag, Jazel Castro ken ti nagibangka ti lucky 9 a ni Jaypee Tutop, agpada a residente da iti Brgy. Parado iti nasao nga ili.
Segun kenni Police Master Sgt. Neil Jan Andres, iti PNP Dingras, maysa ti kapitan ti barangay ti nakisugal iti lucky 9.
Innayon na nga umabot iti nasurok 47 a ribo a pisos ti nakumpiskar a taya dagiti nagsusugal, 40 a pidaso ti baraha, Poker chips, sumagmamano a cellphone, lamisaan ken tugtugaw.
Sumango dagiti maseknan iti panagsalungasing iti PD 1602 wenno illegal gambling.
Saan met a nagsarita ti kapitan iti biang ti Bombo Radyo Laoag.
