LAOAG CITY – Naiget nga imbestigasyon ti iwaywayat dagiti opisyal ti barangay kalpasan a natakawan ti maysa a groserya iti Brgy. Pancian iti ili ti Pagudpud.
Segun kenni Barangay Kagawad Jessie Lagundino chairman iti committee on peace and order, iti nasao a barangay, awan pay ti pakabigbigan dagiti nagtakaw iti groserya ti maysa a kabarangayan da.
Kuna na a mamati dagiti kakarruba ti groserya a napasamak ti panagtatakaw iti alas dos ti parbangon idi kalman kalpasan a nakangeg da ti ringgor.
Inbatad ni Lagundino a nalukatan da dagiti kandado ti ridaw ti groserya babaen ti panangsukit da ken naitaray ti nasurok 1,000 a pisos.
Simrek dagiti saan a nabigbig a suspek iti maysa kadagiti ridaw a mapan iti pagipanan da kadagiti farm supply.
Inbunannag ni Lagundino nga adayu iti pagtaengan dagiti akinkukua manipud iti lugar ti grocery da rason a saan a mabantayan a ti pasdek.
Mainaig iti daytoy, narekobre ni Lagundino ti nasuar a pinagsukit dagiti saan a nabigbig a suspek ken plano da a maipadalan iti fingerprint examination babaen dagiti otoridad.
Naimaldit daytoy a pasamak iti Barangay Blotter.
Inpasingked ni Lagundino nga aramiden da amin a kabaelan tapno matiliw dagiti suspek.
