LAOAG CITY – Inbatad ni ABC Federated President Elmer Faylogna iti Barangay Lorenzo iti ili ti Bangui a ti kabarangayan da a nagpositibo ti covid-19 ket nakaluganan ti taga Pagudpud nga immunan a nagpositibo ti makapatay a virus.
Inlawlawag na a ti kabarangayan da a maika-10 a kaso ti covid-19 ditoy probinsya ket Locally Stranded Individuals (LSI) a naggapo iti Cavite, agtawen ti 26 ken maysa a babai.
Segun kenkuana, iti pannakaiyuswat ti contact tracing ken naamoan da a nakaluganan ti kabarangayan da ti taga Pagudpud ket inpadalan da a dagus daytoy ti swab test, ket positibo ti resulta na.
Inbaga ni Faylogna nga idi simmangpet ni IN-C10 iti ili ti Bangui ket naideretso iti municipal quarantine area da ken kalpasan ti pito nga aldaw ket naipan iti Barangay quarantine.
Innayon na nga idi nakumpirmaran a nakaluganan na ti nagpositibo ti virus a taga Pagudpud ket dimmalan met a dagus ti swab test ti kabarangayan da.
Gapu iti daytoy, nailockdown ti dua a purok iti Barangay San Lorenzo iti ili ti Bangui no sadinno a malimitaran ti panagruwar dagiti residente iti lugar ken mai-schedule ti papan pannakitienda tapno maliklikan ti panagdudupudop dagiti ado a tattao iti tiendaan.
Mainaig iti daytoy, inpakaammo ni Faylogna a naipadalan amin ti rapid test dagiti 18 a nurses, siyam a Barangay Health Workers (BHW) iti Barangay San Lorenzo ken pakairamanan ti head ti Rural Health Unit (RHU) iti ili ti Bangui a nakaduty iti quarantine facility iti nasao nga ili.
Iti agdama ket naka-quarantine dagiti maseknan ken negatibo amin ti rapid test da, ngem maipadalan da pay ti swab test tapno maamoan no negatibo wenno positibo da ti virus.
Kuna na a no agnegatibo dagitoy ti swab test ket mabalin danton ti agsubli iti trabaho da.
Kabayatanna, inbatad ni Faylogna a ti temporaryo pay laeng a mangimanmando iti RHU ket dagiti kameng ti Municipal Disaster Risk Reduction and Management Office (MDRRMO), nurse ti BFP ken PNP, kasta met dagiti dadduma a nurses iti ili a saan a na-expose kenni IN-C10.
