LAOAG CITY – Inlawlawag ni Barangay Chairman Leonidas Ruiz Jr. iti Barangay 19 ditoy ciudad ti Laoag ti sibubukel a napasamak mainaig iti panangprobokar kadakuada ni Barangay Kagawad Ralph Ramos.
Inbaga na a napasamak daytoy idi Mayo 17 iti oras ti alas-10:30 ti rabii kabayatan ti panagduty da kadwa na da Kagawad Mario Agustin ken Kagawad Michael Labugen.
Segun ti kapitan, kabayatan a nakaduty da ket nagsardeng iti ayan da ni Barangay Kagawad Ramos a nakakurung-kurong ket ditoy nga immuna a pinagsasawan na ni Konsehal Agustin no sadinno a kwinestyunaran na no apay a nakaduty ket nakalockdown iti ayan da gapu ta adda ti nagpositibo ti covid-19.
Nupay kasta, basar ken ni Kapitan Ruiz ket insungbat ni Agustin ken ni Ramos a maysa daytoy nga APOR ken saan na a kabbalay ti nagpositibo ti covid-19.
Kalpasan ken ni Agustin ket insublat ni Ramos a pinagsasawan ni Labugen isut gapuna a nakiballaet ni Kapitan Ruiz ken inbaga na a saan koma nga agprobokar ta nakababain aglalo ket nakaduty dagitoy.
Basar ti kapitan, napalalo ti kinabartek ni Ramos iti dayta a gundaway ken nagdardaras laeng a pimmanaw iti ayan da idi tumawtawag da ti pulis tapno ireport ti ar-aramiden na.
Inpetteng ni Ruiz nga imbes nga agbartek ken agprobokar ni Ramos ket mapan koma laengen tumulong kadakuada ita a panawen ti pandemya gapu ta pada da met daytoy a naelektaran kas opisyal ti barangay.
Immunan nga inbaga ni Ramos nga adda ti nangbakal kenkuana isut gapuna a pinataray na ti kurung-kurung na a nagturong iti PNP, ngem naglikudan daytoy ni Kapitan Ruiz.
Inadmitir pay ni Ramos iti Bombo Radyo Laoag nga adda ti diskusyon iti nagbabaetan da kadagiti dua a pada na a konsehal ken nabartek daytoy.
Nupay kasta, inkalintegan na a napan na kinomprontar ni Kagawad Agustin kalpasan nga adda ti nagreklamo kenkuana no apay a nakaduty pay laeng ti naud-udi idinto a nakalockdown ti balay na.
Innayon na a nakadanun iti ayan da Kapitan Ramos gaputa napan nakidaya ken idi limmabas ket ditoyen a kinomprontar na dagiti maseknan.
