LAOAG CITY – Negatibo ti resulta ti RT-PCR Test ni Gob. Matthew Marcos Manotoc pakairamanan ni Miss Earth 2014 Miss Jamie Herrell.
Daytoy ti siraragsak nga inpakaammo ti gobernador kabayatan ti umuna nga “episode” ti ASKMATT ita a tawen 2022.
Mainaig iti daytoy, inpakaammona nga agngudo ita nga aldaw Enero 28 ti “isolation” dagitoy.
Kunana a mabalinna nga ituloy dagiti nagduduma nga aktibidadna kangrunaanna kadagiti naruay a trabahona iti ruar kas gobernador ditoy probinsia.
Innayonna a no pay tallo laengen nga aldaw ti maipatpatungpal nga “isolation” iti sabali a pagilian kalpasan a maalaan ti swab dagiti pasiente ket naiget a sinurotda ti pagannurutan nga inyetnag ti Department of Health a pito nga aldaw.
Makita iti langa ti gobernador ti napalaos a gagarna a mangannong kadagiti naisardeng a trabahona gapu iti panagtalinaedna iti pagtaenganda kalpasan a naalaan ti “swab” kalpasan a nagpositibo iti “antigen test” iti kallabes.
Maipalagip nga inrakurak ni Gob. Manotoc a nagpositibo daytoy iti Antigen Test babaen iti Official Facebook page ti Gobernador.
