LAOAG CITY – Balligi ti naiyuswat a drug buy-bust operation iti maysa a karinderya iti MV Fariñas St., Barangay 9 ditoy ciudad ti Laoag.
Nabigbig ti subject a ni Kristopher Alphonse Ruiz, agtawen ti 37, addaan ti live-in partner ken residente iti Barangay 49-A, ken maysa a diswasher/waiter iti karinderia ken karaman pay a natiliw ti agtagikua iti pasdek a ni Jhon Mark Fernandez, tubo iti ili ti Sinait, Ilocos Sur ngem agnanaed iti Barangay 9 ditoy ciudad.
Ti operasyon ket insayangkat dagiti kameng ti Provincial Drug Enforcement Unit (PDEU) iti Ilocos Norte Police Provincial Office (INPPO).
Naamoan a nakagatang ti police poseur buyer kenni Ruiz ti maysa a sachet ti maatap a shabu nga agbalor ti sangaribo a pisos ken ditoy a tiniliw dagiti otoridad.
Nakumpiskar pay dagiti otoridad ti maysa a kalibre 38 a paltog, tallo a sachet ti naglaon met laeng ti maipagarop a shabu.
Segun kadagiti otoridad, ni Ruiz ket karaman iti maipagarop a drug group nga agop-operar ditoy probinsya ken maibilang nga High Value Individual iti Region1.
Naamoan a datin a nabalod ni Ruiz idi 2017 ken karuruwar na laeng iti pagbalodan idi 2021.
Mainaig iti daytoy, kuna ni Barangay Captain Rodolfo Tomas nga awan ti ammo na nga iligal nga aramid ti subject ken awan ti nadnadlaw da kadagitoy.
Inbatad na a saan na unay nga am-ammo ni Ruiz gapo ta makitkita na laeng no mapan mangan iti karinderya.
Kabayatanna, binalakadan ni Tomas ti publiko a liklikan ti iligal nga aktibidad ken no datin a natiliw ket saanen a sublyanen ti madi nga aramid.
