LAOAG CITY – Inpetteng ni Mr. Alvin Ubasa, ti Information Officer ti PhilHealth ditoy probinsya nga awan ti legal a pagbasaran a mangsuspenso ti panagngato ti kontribusyon dagiti miembro.
Segun kenni Ubasa, no saan a maipatungpal ti panagngato ti kontribusyon dagiti miembro ti PhilHealth ket nalawag a panaglabsing ti korporasyon.
Inlawlawag na a ti uppat a porsiento a panagngato ti kontribusyon ket nakasabar iti linteg ken adda ti direktiba ti Malakanyang a masapol a maimplementar daytoy.
Inbatad na a ti addang ket naibasar iti linteg wenno naisaguday iti Section 10 ti RA 11223.
Kuna pay ni Ubasa a sipud naimplementar daytoy ket sitatallugod dagiti miembro a nagbayad iti premium adjustments.
Mainaig iti daytoy, inadmitir ni Ubasa a ninamnama dan dagiti nagduduma a reaksyon kadagiti miembro ngem babaen iti nasayaat a pannakailawlawag daytoy ket maawatan met dagiti maseknan, banag a nagyamanan ti korporasyon.
Inlawlawag pay ni Ubasa nga iti biang ti self-employed a miembro, dagiti naka-advance idi 2021 para iti premium para iti 2022 ket saanen a sakop ti panagngato iti 100 a pisos iti kada bulan.
Gapo iti daytoy, kunana a dagiti laeng maapektaran a self-employed ket dagiti nagbayad nangrugi idi Enero 2022.
Dinakamat na pay a kadagiti employed a miembro, uray nakabayaden iti Enero agingga ita a bulan iti monthly premium ket karaman iti daytoy a panagngato ti kontribusyon manipud met laeng kadagiti nasao a bulan.
Inulit manen ni Ubasa a ti panagngato ti kontribusyon manipud Enero 2022 ket mabalin a mabayadan agingga intono Disyemebre 31 ita met laeng a tawen ken awan ti interes na.
Kabayatanna, kuna ni Ubasa a ti panagngato ti kontribusyon dagiti miembro ket adda met ti kaasping na a panagdur-as kadagiti benipisyo kas iti pannakaipalawa ti Konsulta, manayunan ti aldaw ti dialysis ken ti baro a linaon ti UHC a Mental Health Packages ken agtultuloy met dagiti dadduma pay a benipisyo a masapol iti kada Pilipino.
