LAOAG CITY – Natay kalpasan a pinaltogan ti maysa a lalaki iti paset ti Barangay Sta. Ana iti ili ti Solsona.
Nabigbig ti biktima a ni Ronel Agni, agtawen ti 41, ken residente iti Barangay Bubuos iti nasao nga ili.
Segun met iti ama ti biktima a ni Mr. Rogelio Agni, awan ti ammo na a rason no apay a napapatay ti anak ken awan met ti nakariri daytoy.
Inbatad na a sakbay ti insidente, napan ti anak na ken dagiti uppat pay a kakadwa na nakiminatay iti Barangay Sta. Ana ngem gapo ta awan ti naiyuswat nga ay-ayam ket nagawid da ken ditoy metten a napaltogan.
Kunana nga awan met pay ti dimmanon kenkuana nga impormasyon no adda ti nakariri ti anak na iti napanan da a minatayan.
Naamoan a no adda ti minitay iti ili da ket mapan dumayo ti anak na ken dagiti kakadua na a makiay-ayam.
Ummuna iti daytoy, naamoan a bayat nga agawid ti biktima iti tengnga ti rabii ket pinaltogan dagiti suspek a nakamotorsiklo ken dagus dagitoy a naglibas.
Nagsagaba ti tallo a tama ti paltog ti biktima ken naitaray iti Dingras District Hospital ngem naideklara a dead on arrival babaen kadagiti doktor.
Iti agdama, agtultuloy pay laeng ti imbestigasyon dagiti otoridad.
