LAOAG CITY – Natiliw ti maysa a baro iti lauden a paset ti Holy Spirit Academy ti Brgy. 15, San Guillermo ditoy ciudad ti Laoag.
Daytoy ket kalpasan a balligi a naisayangkat ti drug buy-bust operation babaen iti nagtitipon a pwersa ti PIU-INPPO, PDEU INPPO, RPDEU1, CIDG Ilocos Norte, RID PRO1, PDEA-INPO ken Laoag City Police Station.
Basar kadagiti otoridad, nabigbig ti subject ti operasion a ni Ian Mark Torrecampo y Ruiz AKA Mark Ruiz, agtawen ti 18, awanan ti trabaho, residente ti Macalva Norte iti ili ti Agoo idiay probinsia ti La Union.
Naarestar ti suspek kalpasan a naglako ti maysa a dakkel a transparent self sealing plastic bag a maatap a naglaon ti napagango a bulong ti marijuana a naikabil iti maysa a dakkel a paper bag iti maysa a pulis a nagpammarang a poseur-buyer.
Nakumpiskar pay manipod iti suspek ti dua a plastic sachet a naglaon ti maipagarup a napagango a bulong ti marijuana a nakadulin iti naikulpi a bond paper.
Malaksid iti daytoy, naala pay ti maysa a pidaso ti genuine one thousand peso bill ken uppat a pidaso ti one thousand peso a boodle money a nausar kas buy-bust money pakairaman ti maysa a wallet nga agmaris ti pink a naglaon ti 89 pesos iti nagdumaduma a denominations ken dagiti alahas.
Ti nakumpiskar a maipagarup a napagango a bulong ti marijuana ket mapatta-patta nga agdagsen ti 95 grams nga addaan ti street value a Php. 9,500.00.
Pakaseknan iti daytoy, basar kadagiti otoridad a naggapu pay idiay La Union ti suspek ken nagturong ditoy probinsya para iti transaksion.
Naammoan a ti suspek ket maibilang kas Street Level Individual.
Mainaig iti daytoy, naiget a naglikudan ti suspek a kukuana dagiti nakumpiskar kenkuana ken saanen a nangted iti aniaman a komento.
Iti agdama, adda iti kustodyar ti kuerpo ti pulisia ditoy Siudad ti Laoag ti suspek a manamnama a sumango ti kaso gapu iti panagsalungasingna iti Section 5 ken 11 Art. II ti RA 9165 wenno ti Comprehensive Dangerous Drugs Act of 2002.
Kabayatanna, mannarimaan pay laeng ti imbestigasion dagiti otoridad no addan ti immunan a nakairamramanan ti suspek.
