LAOAG CITY – Maisagsaganan dagiti kasapulan a dokumento para iti pannakaipila ti kaso kontra iti subject ti drug buy-bust operation iti barangay 15 ditoy ciudad ti Laoag.
Nabigbig daytoy a ni Ian Mark Torrecampo y Ruiz AKA Mark Ruiz, agtawen ti 18, estudyante, residente ti Macalva Norte iti ili ti Agoo idiay probinsia ti La Union.
Segun kenni Police Staff Seargeant Mario Errol Tangonan iti Investigation Section ti PNP Laoag, makikoordenar da iti ili ti Agoo tapno maamoan ti katatao ni Torrecampo.
Inbatad na pay a basar kenni Torrecampo, inbaon isuna ti maysa nga indibidual a maipagarop a saan na nga am-ammo nga umay mangipan ti paper bag a naglaon ti mapapati nga iligal a droga ditoy ciudad ti Laoag.
Kuna ni Tangonan nga iti palawag ni Torrecampo iti kapulisan, kakinnita na iti sangwanan ti kapitolyo probinsyal.
Rumrumuar a saan nga ammo ni Torrecampo no anya ti linaon ti paper bag a naiwayat kenkuana ken damo na ti agturong ditoy ciudad ti Laoag.
Mainaig iti daytoy, kuna ni Tangonan a manarimaan ti koordinasyon da iti ili ti Agoo seknan iti daytoy ken ammoen da no siasinno ti rumrumuar a nangibaon keno Torrecampo ken ti kakinnita na kuma ditoy ciudad ti Laoag.
Maipalagip nga iti naiyuswat nga operasyon, rumrumuar a naglako ni Torrecampo iti poseur buyer ti dakkel a transparent self sealing plastic bag a maatap a naglaon ti napagango a bulong ti marijuana a naikabil iti paper bag
Malaksid iti daytoy, nakumpiskar pay manipud iti suspek ti dua a plastic sachet a naglaon ti maipagarup a napagango a bulong ti marijuana a nakadulin iti nakupin a bond paper; sabali pay ti maysa a pidaso ti genuine one thousand peso bill ken uppat a pidaso ti one thousand peso a boodle money a nausar kas buy-bust money pakairaman ti maysa a wallet nga agmaris ti pink a naglaon ti 89 pesos iti nagdumaduma a denominations ken jewelries.
Ti nakumpiskar a maipagarup a napagango a bulong ti marijuana ket mapatta-patta nga agdagsen ti 95 grams nga addaan ti street value a Php. 9,500.00.
