LAOAG CITY – Agtultuloy pay laeng ti naun-uneg nga imbestigasyon ti PNP-Laoag kalpasan ti pannakabagko-bagkong ti maysa a lalaki iti Barangay 18 ditoy ciudad.
Ti biktima ket agtawen ti 28, awanan ti asawa, maysa a sales representative iti dakkel a Mall iti ili ti San Nicolas ken residente iti Barangay Juan iti ili ti Solsona.
Iti inisyal nga impormasyon, ti biktima ket agtugtugaw iti igid ti kalsada idi adda ti nagsinnapgud a maysa a tricycle ken maysa a motorsiklo.
Naamoan a napan ti biktima iti nakapasamakan ti desgrasya ngem ditoy a kellaat a nabagko-bagkong babaen iti saan pay a nabigbig a suspek.
Gapo iti daytoy, nagsagaba ti tallo a bagkong iti barukong ti biktima ken dagus a naitaray iti ospital ngem naideklara a dead on arrival.
Iti agdama, ireview ti PNP dagiti CCTV footage a nakaimuntar iti asideg ti nakapasamakan ti insidente.
