LAOAG CITY – Inbatad ni Mr. Rommel Pucan, jeepney driver iti rota a Laoag-Paoay a plano da ti umapela iti Land Transportation Franchising and Regulatory Board (LTFRB) para iti pannakaipangato ti plete iti masakupan da.
Daytoy ket gapu iti agtultuloy a panagngato ti presyo dagiti produkto a petrolyo.
Inlawlawag na nga iti baet nga adda dagiti gundaway a bumaba ti presyo ti petrolyo ket bassit ken saan a madlaw ti pagbabaan na idinto a no maipangato ket dakkel a dagus ti pagngatoan na.
Segun ken ni Pucan, kadagitoy a gundaway ket sursuruten dan ti regular a plete ken adda ti diskwento dagiti estudyante, senior citizen ken PWD.
Nupay kasta, iti pannakaipangato ti presyo dagiti produkto a petrolyo ket sigurado a bassit manen ti mapastrek wenno maiyawid da.
Gapu iti daytoy, inpalgak ni Pucan a maipaayan da koma manen ti subsidy tapno makaabrot da ken adda ti mangsupusop iti dakkel a pukaw da gapu iti kinangina ti presyo dagiti produkto a petrolyo.
