LAOAG CITY – Nauram ti maysa a balay kalpasan a maipagarop a pinuuran ti mismo nga akinbalay iti Barangay Talingaan ditoy ciudad ti Laoag.
Nabigbig ti agtagikua ti balay a ni Roger Cachero, addaan ti umno a tawen, construction worker ken residente iti nadakamat a barangay.
Segun iti kabsat ni Roger a ni Elsied Cachero, nabartek ti kabsat na idi maipagarop a pinuuran na ti balay na.
Inlawlawag na a kabayatan a naipakaammo kadakuada a maur-uram ti balay ti kabsat na a ni Roger ket insigida da a napan kinita ken nagtitinnulungan dan a sinebseban ti apoy.
Inbatad na a kabayatan nga iyur-uray da ti panagresponde dagiti bombero ken dagiti kameng ti pulisya ket tintingngelen na ti kabsat na.
Nupay kasta, idi dumteng dagiti pulis ket inibbatan nan ti kabsat na ngem isu metten ti panagtaray ken panaglibas ti maseknan.
Inpakaammo ni Elsied a nagsinan ti kabsat na ken ti asawa na gapu ta saan da nga agkinnaawatan isut gapuna nga agmaymaysan nga agbibiag.
Mainaig iti daytoy, possible a ti sangwen ni Roger Cachero ket kaso nga arson.
Kabayatanna, agpapan ita ket saan pay a masinunuo no mano amin ti balor dagiti nadadael iti napasamak nga uram ngem ti kangrunaan a naapektaran ket ti kwarto ti maseknan.
