LAOAG CITY – Tinagtagbat ti maipagarop a nabartek a lalaki dagiti dua a pada na nga aglaklako iti tiendaan iti ciudad ti Batac.
Binigbig ti Philippine National Police iti ciudad ti Batac ti suspek a ni Erwin Echianique, agtawen ti 52, naasawaan, ken residente iti Brgy. San Mateo iti nasao a ciudad idinto a dagiti biktima ket da Ronald Lumaguip,naasawaan, ken Mary Jane Oaquera,naasawaan, agpada a residente iti Brgy. Ricarte ti nasao a ciudad.
Basar iti imbestigasyon dagiti otoridad, inparking ni Echianique ti wing van da iti sangwanan ti tiendaan iti ciudad ti Batac gapu ta napan nagdeliver ti natnateng kalpasan na ket timmalaw.
Iti panagsubli ni Echianique a nakabisekleta ket nadanun na dagiti duwa a biktima a manarimaan iti panangirikep dan iti vegetable stall da.
Inpakaammo ti Philippine National Police (PNP) iti ciudad ti Batac a sakbay a pimmanaw dagiti biktima ket maipagarop nga adda ti nagririan da a nangitunda ti panagpungtot ti nabartek a suspek.
Gapo iti nakaro a pungtot ti suspek ket inasot na ti buneng na kalpasan na ket tinagtagbat na dagiti biktima a nagsagabaan da ti sugat ti siko ken abaga da.
Naamoan a kalpasan ti insidente ket naglibas a dagus ti suspek babaen met laeng ti panaglugan na iti bisikleta na.
Naitaray met a dagus dagiti biktima iti Mariano Marcos Memorial Hospital and Medical Center para iti naan-anay a pannakataming da idinto a natiliw met laeng dagiti otoridad ti suspek nga iti agdama ket addan iti kustodyar ti pulisya.
Agtultuloy pay laeng ti naun-uneg nga imbestigasyon dagiti otoridad tapno madeterminar nu ania ti maipila a kaso kontra iti suspek.
