LAOAG CITY – Nabirukanen ti mapukpukaw a motorsiklo iti Brgy. Sitio 2, Brgy. 45, Tangid ditoy Siudad ti Laoag.
Segun ken ni Art Joemar Paguirigan, akinkukua ti motorsiklo ken residente ti nasao a Barangay, nabirukan ti motorsiklona a Mio 125 Soul I nga agmaris ti mat green iti pagtaengan ti girlfriend ti suspek iti Brgy. Lubigan iti ili ti Badoc.
Inbatadna a nasapulanda ti motorsiklo babaen iti panangi-post iti social media nga agnanaed iti compound-da gapu ta adda ti nag-message iti daytoy a nakitada ti birbirukenda a motorsiklo.
Kunana a malaksid iti daytoy ket balligi a naisubli kenkuana ti motorsiklo babaen iti koordinasion ti Philippine National Police ditoy Siudad ti Laoag ken ti PNP Badoc no sadino dagiti otoridad ti nangipakaammo kenkuana a nabirukanen ti mapukpukaw a motorsiklo daytoy.
Gapu iti daytoy, kunana a dagusda napan innala ti motorsiklo iti pagtaengan ti girlfriend ti suspek kaduana ti maysa a Konsehal ken dagusda a nagkamang iti kuerpo ti pulisia ditoy Siudad tapno pormal daytoy nga i-report.
Inlawlawagna nga idi kitaenda ti motorsiklona ket mapukpukaw ti wallet daytoy a nakaipalaunan ti driver’s license banag a paglibakan ti suspek nga innalana daytoy.
Innayonna a saan a naka-lock ken naibatina ti tulbek ti motorsiklona isu nga alisto a naitaray daytoy.
Maipalagip a natakaw ti motorsiklo iti mismo uneg ti pagtaengan ti akinkukua.
Iti agdama, adda iti pagbaludan ti Philippine National Police ditoy Siudad ti Laoag ti suspek a nagtakaw iti motorsiklo.
