LAOAG CITY – Kiniddaw ni Ms. Jomara Chan, Health Education and Promotion Officer ti Department of Health – Center for Health Development – Ilocos kadagiti kameng ti Media ti natibtibker pay a panagkinnammayet.
Daytoy ket kabayatan ti Bi-Annual Media Partnership Forum iti Brgy. Namtutan, Bypass iti San Fernando City, La Union nu sadino a nagatendar ti kameng ti Bombo Radyo Laoag.
Segun kenkuana, dakkel ti tulong dagiti kameng ti Media iti pannakairakurak dagiti napapateg a damdamag pakaseknan iti benneg ti salun-at.
Inbatadna a kalikagum ti ahensia a maikkan ti gundaway dagiti kameng ti Media nga agsaludsod kadakuada aniaman ti topiko wenno isyu tapno mailawlawag kadagiti tattao ti takder ti ahensia.
Inlawlawagna a napintas nga adda ti naiyuswat a Bi-Annual Media Partnership Forum tapno daytoy ti agbalin a wagas tapno ad-adda pay a mapasingkedan ti panagkaykaysa iti pannakaiwaras dagiti impormarsion iti ahensia da.
Mainaig iti daytoy, kiniddaw met dagiti kameng ti Media ti al-alisto a pannakaipadanon dagiti damdamag babaen iti panangipasada ti ahensya kadagiti press release kageddan ti pannakatalantan ti nagduduma a kapanpanunutan tapno ad-adda pay nga agbalin a responsable ken mapagtalkan nga agirakrakurak.
Kabayatanna, manamnama nga agturong met ni Department of Health Officer in Charge Dr. Ma. Rosario Vergeire iti ili ti Sison iti probinsia ti Pangasinan inton bigat tapno atendaran ti maysa a programa a nairanta para kadagiti indigenous people nga agnanaed kadagiti nasusulinek a lugar.
