LAOAG CITY – Kinumpirmaran ni Vice Mayor Jonathan De Lara iti ili ti Solsona a naawat nan ti surat manipud iti Ombudsman a nakailanadan ti pannaka-ibasura ti kaso kriminal kontra kenkuana idi isuna pay laeng ti Mayor.
Ti nasao a kaso ket inpila ti grupo ni dati a Mayor Alex Calucag kontra kenni Vice Mayor De Lara, Mayor Jospeh De Lara idi isuna pay laeng ti bise mayor, dati a Municipal Administrator, dati a Municipal Health Officer ken dadduma pay idi 2016.
Segun kenni De Lara, ti kaso ket pakaseknan Statement of Assets, Liabilities, and Net Worth no sadinno saan da nga inpan ti nagduduma a kabagyan da nga agserserbi iti gobierno.
Inbatad na nga adda ti gundaway a saan na a naipan ti nagan dagiti kabagyan na, ken ammo met ti publiko nga agkakabagyan dagitoy rason nga awan ti ilimlimed na.
Inpetteng na a ti saan a pannakaipan ti nagan dagiti kabagyan na iti Statement of Assets, Liabilities, and Net Worth (SALN) na ket saan na a kayat nga sawen nga adda ti ilimlimed wenno panagkunniber a napaspasamak.
Kunana a ti pannakaibasura ti kaso kontra kadakuada ket daytoyen ti sungbat iti rakurak idi ni dati a Sang. Bayan Mark Dennis del Castillo nga adda ti ur-urayen da a desisyon manipud iti Ombudsman.
Inlawlawag na a sipud idi ket saan a daytoy a kaso ti tuttutukan da gapo ta patien da nga awan met ti ammo da a basol da iti daytoy ken awan ti intensyon da a madi iti saan a pannakaipan iti Statement of Assets, Liabilities, and Net Worth da dagiti kabagyan da nga agpapaay iti gobierno.
Mainaig iti daytoy, inpalgak na a ti kalikagom dagiti nagpila ti kaso kontra kadakuada ket maipagarop a maikkat da iti pwesto tapno dagitoy ti agturay iti ili ti Solsona.
Kabayatanna, kunana a ti nasao nga addang ti grupo kontra kadakuada ket pamulpulitika.
