LAOAG CITY – Natiliw dagiti dua nga indibidual gapo iti iligal a panagkalap iti Bislak River a sakop ti Sito 4, Barangay Buyon iti ili ti Bacarra.
Nabigbig dagiti natiliw nga isuda Erwin Agas, agtawen ti 39, naasawaan ken residente iti Barangay Cabaroan ken ni Menard Javier, agtawen ti 39, naasawaan ken residente iti Baranga Casilian iti nasao met laeng nga ili.
Segun kenni Police Major Sheryll Guzman, ti chief of police iti Philippine National Police iti ili Bacarra, nangiyuswat da ti panagpatrolya ken nakaawat da ti impormasyon mainaig iti panagkuryente dagiti suspek ti lames iti nasao a karayan.
Naamoan a naaktoan a mismo dagiti otoridad ti iligal a panagkalap wenno panagkuryente iti lames dagiti dua a suspek.
Nakumpiskar kadagiti dua a suspek ti dua a set ti Electro fishing apparatus nga addaan ti 12 volts battery, agarop dua a kilo ti bukto ken udang nga agbalor ti 700 a pisos ken dagiti motorsiklo da.
Kabayatanna, dagiti dua a suspek ket nagtalinaed iti kustudiyar ti Philippine National Police iti ili Bacarra ken manamnama a mapilaan dagitoy ti kaso a panaglabsing iti Republic Act 10654 wenno Illegal Fishing/Electrofishing.
