LAOAG CITY – Nag-emergency landing iti Laoag International Airport ti eroplano ti VietJet Air nga agturong kuma idiay Phu Quoc, Kien Giang Vietnam manipud iti Incheon, South Korea.
Segun kenni Mr. Ronald Estabillo, ti CAAP Manager iti Laoag International Airport, technical problem ti rason no apay a nag-emergency landing ti eroplano a nagluganan dagiti 207 a pasaheros ken pito a crew.
Inlawlawag na a ti Laoag International Airport ti kaasitgan nga eropuerto manipud iti Incheon, South Korea iti panagturong iti Vietnam rason a ditoy a nag-emergency landing ken nagkiddaw ti assistance.
Inbatad na a kalpasan ti panag-emergency landing ti eroplano ket nakikoordenar da a dagus iti Bureau of Customs, Bureau of Immigration ken ti Bureau of Quarantine.
Kunana nga urayen da met ti eroplano manipud Vietnam nga isu ti pagluganan to dagiti pasaheros a mapan iti nasao a pagilyan ken ti eroplano ket agtalinad iti eropuerto agingga a matarimaan.
Inbatad met ni Ms. Cydy Meden Benigno-Baradi, ti Acting Alien Control Officer nga iti naiyuswat a panagtataripnong ket naidiaya ti panagpasyar pay laeng dagiti ganganaet ditoy probisnya ken adda pay dagiti bus a pagluganan dagitoy ngem saan nga inpalubos ti Airline Company nangruna ket saan a ditoy ti pinal a destinasyon dagitoy.
Mainaig iti daytoy, inbatad ni Atty. Ericson Tagabi, ti Customs Operation Officer a no sumangpet ton ti rescue airplane ket dagiti bagahe met dagiti pasaheros ti kangrunaan a tutukan da.
Kabayatanna, inpanamnama ni Estabillo ti seguridad dagiti pasaheros ken crew bayat ti panangur-uray da ti rescue airplane.
