LAOAG CITY – Pimmusay ti maysa a mannalon gapu iti maipagarup a pannakakimatna idi malem ti Domingo iti Brgy. 10, San Miguel iti ili ti Sarrat.
Segun kenni Police Corporal Harold Aguilar, Duty Investigator ti Philippine National Police iti ili ti Sarrat, nabigbig ti biktima a ni Dennis Ramos, agtawen ti 44, naasawaan ken residente iti nasao a barangay.
Inbatadna a basar iti insayangkatda nga imbestigasion, kuna ni Mrs. Nerisa Ramos, asawa ti biktima a napan kinita ti asawana dagiti dua a tarakenna a baka iti pagiyap-aponanna iti pagtatalonan kabayatan ti napigsa a buyat ti tudo, kimat ken gurrood.
Inlawlawagna a gapu ta saanen a mauray ti misis ti biktima nga agawid ti misterna ket ditoy a nagturongda iti pagiyap-aponanda ti baka.
Kunana a ditoy metten a nakitada a nakadasay ti asawana nga awanen ti biag iti kataltalonan.
Mainaig iti daytoy, kuna ni Aguilar a mamati ti pamilia Ramos a nakimat ti maseknan gapu ta adda ti lamma dagiti sumagmamano a paset ti bagina idi mabirukanda ti biktima.
Innayonna nga inpakaammo ti asawa ti biktima nga imposible a naatake wenno pimmusay gapu iti sakit daytoy gapu ta awan met ti sagsagabaenna a sakit.
Kabayatana, iti agdama ket nakamansayag ti bangkay ti mannalon iti pagtaenganda iti nadakamat a lugar.
