LAOAG CITY – Naan-anayen a nagbalin a linteg ti kontrobersyal a Maharlika Investment Fund kalpasan a pinirmaanen ni Pres. Ferdinand “Bongbong” Marcos Jr.
Pinirmaan ti presidente ti gakat iti Kalayaan Hall iti Malacañang Palace iti presensya dagiti miembro ti Senado ken House of Representatives.
Napirmaan ti Republic Act No. 11954 iti laksid ti panagamak ken ti dinakamat dagiti agpanpanday linteg a errors ken discrepancies iti Maharlika Investment Fund karaman dagiti saan a masinunuo a probisyon na.
Iti panagbitla na, kuna ni Marcos a ti Maharlika Investment Fund ket maysa a bold step para itieconomic transformation ti pagilyan bayat a ti Pilipinas ket agrekobre manipud iti epekto ti COVID-19 pandemic.
Segun pay kenni Marcos, iti ummuna a gundaway iti pakasaritaan ti Pilipinas ket addan ti sovereign wealth fund para iti economic development.
Inalay-ayan ni Marcos ti panagamak iti pannakausar ti Maharlika Investment Fund ken kunana a daytoy ket independent manipud iti gobierno ken saan kuma a maikonektar iti pulitika.
Inpetteng ti presidente ti tulbek para iti panaddur-as ti Maharlika Investment Fund ket no kasano ti pannakaimanehir na daytoy.
Inpasigurado pay ti presidente iti publiko a daytoy ket saan a mausar a paggatang kadagiti nangingina a banbanag.
Kabayatanna, awan pay ti naiparuk-at a kopya iti nasao a linteg ngem basar iti impormasyon manipud iti Presidential Communications Office, adda ti maestablisar a Maharlika Investment Corporation (MIC) nga isu ti agserbi kas sole vehicle para iti pannakaimanehir ti Maharlika Investment Fund.
