LAOAG CITY – Mamati ni Gob. Matthew Marcos Manotoc a makatulong a mangitandudu iti Ilocos Norte kangrunaan na iti turismo ti naaramid a Netflix film ditoy probinsia.
Namnamaen ti gobernador nga iti pannakaipabuya ti nasao a pelikula iti Netflix ket adu ti maawis nga umay ditoy probinsia tapno maimatanganda a mismo dagiti napipintas a lugar a nakaaramidan ti pelikula.
Naammoan a ti nasao a pelikula ket pagkaduaan da Lovie Poe ken ni Carlo Aquino a naisentro ti estoria no ti nasinged nga agpagayam ket mabalin a “best match”.
Kabayatanna, inpakaammo ti gobernador nga itultuloy ti gobierno probinsial ti Ilocos Norte ti inrugi ni Sen. Imee Marcos idi isu pay laeng ti gobernador ditoy probinsia a panangtulong kadagiti agkalikagum nga umay ag-shoot ditoy probinsia.
Imbatadna a nagtalinaed ti Media Incentive Desk wenno MID ti Communications and Media Office a tumultulong kadagiti maseknan nga agbiruk kadagiti lugar a kalikagum dagitoy a pangisayangkatan ti shooting.
Inlawlawagna a babaen iti daytoy ket ad-adu pay dagiti maawis nga umay mangisayangkat ti shooting ditoy probinsia nga agserbi a libre a promosyon dagiti nadumaduma a napipintas a lugar iti Ilocos Norte.
Kagiddan daytoy, nagyaman ti gobernador kadagiti immayen nangisayangkat ti shooting ditoy probinsia ken gutgutigutenna dagitoy nga agsubli ken impatalgedna ti agtultuloy a pannakaipaay kadakuada ti napintas a pannakaasikaso.
Maipalagip a naruayen dagiti pelikula, teleserye, TV segment ken dadduma pay a naaramid iti probinsia a dakkel a tulong iti pannakaitandudu ti turismo ditoy probinsia.
