LAOAG CITY – Natay ti maysa a senior citizen kalpasan ti pannakakuryente na babaen iti nakalaylay a waya ti kuryente iti Barangay Bacsil iti ili ti Paoay.
Nabigbig ti biktima a ni Rogelio Caoagas, agtawen ti 69, maysa a mannalon ken residente iti nasao a barangay.
Segun kenni Police Capt. Sygman Benigno, ti chief of police ti Philippine National Police iti ili ti Paoay, ti nakapasamakan ti isidente ket isu ti pagiyap-apunan ti biktima kadagiti dingwen na.
Inlawlawag na nga iti dayta a gundaway, napan nagiyapon ti biktima iti dingwen na aginga a saanen a mapasangpet ti pamilya na isut gapo na a sinaruno ti anak na ken ditoy a nakita na ti ama na a nakadasay.
Rumrumuar a ti nadakamat a waya ti kuryente ket napugsat bayat ti ididuprak ti Bagyo Egay ken inreport met ti pamilyda iti Ilocos Norte Electric Cooperative (INEC).
Mainaig iti daytoy, inbatad ti pamilya ti biktima a pagsasaritaan da pay no anya ti sumaruno nga addang da ngem kalikagom da a tumulong ti kooperatiba iti magastos iti pannakaimansayag ti biktima.
