LAOAG CITY – Awan ti mapanunot ni Kagawad Annabel Felipe iti Barangay 27 ditoy ciudad ti Laoag ken ikit ti biktima ti pammaltog iti Barangay 26 no anya ti mabalin a rason iti krimen.
Ti biktima ket ni Rosefrida Mariano, agtawen ti 39 ken residente iti Barangay 27 ditoy ciudad ti Laoag.
Segun kenni Felipe, ti laeng ammo na a trabaho ni Mariano ket ti panagbalin a real estate broker ken awan unay ti komunikasyon da gapo ta agnanaed ti biktima iti ciudad ti Batac nga isu ti nakaikamangan na.
Inlawalawag na a saan na pay nga ammo nga adda ditoy ciudad ti Laoag ti biktima idi pay laeng Agosto 10 ken saan da pay a nagkita agingga a napaltogan ti kaanakan na.
Saan met a masungbatan ni Felipe ti rumrumuar nga impormasyon nga adda dagiti maipagarop a linukluko ti biktima wenno kinariri na ngem adda dagiti madamdamag na seknan iti daytoy a banag.
Nupay kasta, inbatad na adda ti nagturong iti barangay da a maysa nga indibidual no a nangireklamo kenni Mariano ngem saan metten a nagsubli ken binagaan na ti kaanakan na nga i-setlle na daytoy a tinungpal met ti biktima.
Mangnamnama met ni Felipe a malasatan ti biktima daytoy a napasamak.
Kinumpirmaran met ni Police Lt. Col. Joseph Baltazar, ti chief of police ti Philippine National Police – Laoag a maysa kadagiti kitkitaen da a posible a motibo iti pammaltog ket ti trabaho ti biktima gapo ta maipagarop nga adda ti nalukluko na.
Kuna ni Baltazar nga iti agdama ket adda iti stable a sitwasyon ti biktima kalpasan a dimmalan iti operasyon ken nagtalinaed iti Mariano Marcos Memorial Hospital and Medical Center iti ciudad ti Batac.
Maipalagip nga idi rabii ket napaltogan ti biktima bayat a nakalugan iti Fortuner na babaen kadagiti dua a saan pay a nabigbig a suspek a naglugan ti motorsiklo.
Kabayatanna, agtultuloy pay laeng ti naun-uneg nga imbestigasyon dagiti kameng ti Philippine National Police ditoy ciudad ti Laoag seknan iti pammaltog.
