LAOAG CITY – Saan a mangipila ti reklamo ti pamilya ti baro a pimmusay kalpasan a tinagtagbat ti bukod na nga ama iti Barangay Sta. Cruz iti ili ti Currimao.
Daytoy ti kinumpirmaran ti Philippine National Police iti nasao nga ili.
Ummunan a nabigbig ti biktima a ni Herbert Menor, agtawen ti 37, awanan ti asawa, construction worker, idinto a ti suspek ket ni Nestor Menor y Labancoc, agtawen ti 65 ken residente iti nadakamat a barangay.
Iti naun-uneg nga imbestigasyon ti pulisya, masansan nga agawid a nakainom ti biktima ngem idi ket saan latta a nagun-uni ti ama na.
Maipalagip nga iti rabii a napasamak ti insidente, nagawid manen ti biktima a nakainom ti nasanger ken nagsao-sao isut gapo na nga inanawa ti ama na ngem saan na nga inkaskaso daytoy.
Gapo iti daytoy, saan a nakateppel ti ama ken innala na ti buneng nga isu ti intagtagbat na iti tengnged ken abaga ti anak na a puon ti nakatayan na.
