LAOAG CITY – Balligi ti naiyuswat a search operation iti Brgy. 20 Capurictan, Solsona, Ilocos Norte.
Nabigbig ti subject ti operasyon a ni Levy John Guillermo, agtawen ti 41, naasawaan, drug surrenderee ken residente iti nadakamat a barangay.
Naisayangkat ti operasyon babaen iti nagtitipon a pwersa ti Provincial Intelligence Unit nga isu ti lead unit, Provincial Drug Enforcement Unit, PSET, Solsona Municipal Police Station, QRT Solsona, ken 101st MC, RMFB1.
Ti warrant of arrest ket inparuk-at ti Judge ti Regional Trial Court Branch 16, Laoag City, a napetsaan ti August 31, 2023 gapo iti panaglabsing ti suspek it Republic Act 10591.
Naala iti pagtaengan ni Guillermo ti maysa a Cal. 38 revolver nga addaan ti marking a Colt 38 Special Medallion USA; dua a pidaso ti bala ti Cal. 38; maysa a bassit a bag nga agmaris ti nangisit ken nalabbaga, siyam a cal. 22 ammunitions; maysa a cal. 22 ammunition ken dua nga empty shell ti Cal. 22; maysa a bala ti Cal. 45 ken maysa a bandolier.
Iti agdama, ti subject ti operasyon ket nagtalinaed iti kustudiyar ti pulisya iti ili ti Solsona.
