LAOAG CITY – Umabot iti uppat a gasut siyam a pulo ket tallo a kakailian a nadadaelan a naminpinsan ti balay iti isasaplit ti bagyo Egay ti naipaayan ti tulong manipod iti Department of Human Settlement and Urban Development.
Segun ken ni Gob. Matthew Marcos Manotoc, naipaayan ti tunggal maysa a benepisiario ti sangapulo ribu a pisos.
Mainaig iti daytoy, impadanon ti gobernador ti napalaus a panagyamanna iti Department of Human Settlement and Urban Development nangnangruna ken ni Regional Director Atty. Richard Venancio Fernando V. Ziga a nangidaulo a mismo iti pannakaiyawat ti nasao a kantidad kadagiti benepisiario.
Inlawlawagna a dagiti nabenipisiaran iti nasao a tulong a naggapo iti Department of Human Settlement and Urban Development ket dagiti kakailian iti ili ti Bacarra, Vintar, Piddig ken Burgos.
Imbatad ti gobernador nga umabot amin iti nasursurok ngem uppat a pulo ket tallo ribu a pisos ti tulong a maawat dagiti nadadael a naminpinsan ti balayda agsipud ta immunan a nangipaay ti Department of Social Welfare and Development babaen iti Emergency Cash Transfer iti sangapulo ket tallo ribu lima gasut a pisos ken duapulo ribu a pisos ti naggapo iti National Housing Authority.
Innayonna a malaksid kadagiti nasao a tulong mabalin dagiti maseknan ti agkiddaw kadagiti nayun a kasapulanda a construction materials ken pagbinnuligan daytoy nga ipaay ti gobierno probinsial ti Ilocos Norte ken dagiti maseknan a gobierno municipal.
