LAOAG CITY – Dagus a pimmusay dagiti dua nga indibidual kalpasan a naidungpar ti nagluganan da a kurong-kurong iti Florida Bus iti paset ti Brgy. 18, Magnuang, Batac City, Ilocos Norte.
Nabigbig dagitoy pimmusay nga isuda Jonathan Parbo, agtawen ti 40, mannalon ken ni Jomar Castillo, agtawen ti 20 ken agpada a residente iti Barangay Pimentel iti nasao a ciudad.
Basar iti report manipud iti Philippine National Police iti ciudad ti Batac, agpaabagatan ti bus nga inturong ni Luis Barroga, agtawen ti 60, naasawaan ken residente iti Barangay 27 ditoy ciudad ti Laoag.
Idi nakadanon iti paset ti Barangay Magnuang ket nakasinnabat na ti napaspas ti taray na a kurong-kurong a nagluganan dagiti dua a pimmusay ken tallo pay nga indibidual nga isuda Mary Dun Cardenas, Mary Chris Pareja ken maysa nga agtawen ti siyam ken agpapada a residente iti Brgy. Pimentel.
Naamoan a gapo iti napaspas a taray ti kurong-kurong ket immagaw iti linya a rason ti pannakaidungpar na iti bus.
Gapo iti daytoy, naitupar iti concrete pavement dagiti dua da Castillo ken Pabro a puon ti dagus a pannakatay da idinto a dagiti tallo a kakadua da ket nagsaba ti sugat iti nagduduma a paset ti bagi da ken naitaray dagitoy iti Mariano Marcos Memorial Hospital and Medical Center idinto a saan met a naan-ano ti driver ti bus.
