LAOAG CITY – Umabot iti sanga gasut limapulo ket maysa (151) dagiti HOTS wenno “Hired on the Spot” iti pannakaisayangkat ti Naruay a Panggedan Job Fair” iti Robinsons Mall ti ili ti San Nicolas.
Daytoy ti naragsak nga inpakaammo ni Mrs. Anne Marie Lizette B. Atuan, manager ti Public Employment Service Office wenno PESO ti gobierno probinsial.
Imbatadna nga immabot iti uppat a gasut siyam a pulo ket lima dagiti nagbalin nga aplikante.
Inlawlawagna nga immabot iti tallopulo ket uppat dagiti pribado a kompania, sangapulo ket maysa a National Government Agencies wenno NGA’s ken tallo nga overseas recruitment company ti nakipagpaset iti nadakamat nga aktibidad.
Inbunannag ni Atuan a malaksid kadagiti Hired on the Spot ket adda pay dagiti aplikante a mangiyur-uray iti pannaka-interview da kadagiti nagaplikaran da a kompania.
Mainaig iti daytoy, inpanamnamana ti panangi-follow-up da iti resulta ti aplikasyon dagiti umili a nanggundaway iti nasao a job fair.
