LAOAG CITY – Napalaos ti ragsak ni Barangay Chairman Jogie Calapao iti Barangay Barani iti ciudad ti Batac ken dagiti kalugaran da iti naawat da a pammadayaw partikular ti Cleanest Barangay.
Segun kenni Calapao, ti pammadayaw ket naiyawat kabayatan ti Major Health event iti probinsya ti Ilocos Norte para iti “Linis-Ligtas Barangay Cleanup Drive: Ang Barangay na MALINIS ay kaisa para sa Healthy Pilipinas!” a programa ti Dept. of Health Regional Office 1.
Inbatad na nga iti pasalip, nangrugi babaen iti clean up drive idi Sept 4 agingga iti 18 ken kalpasan daytoy ket nangisubmitir da ti Audio-Visual Presentation ken Poster and Slogan iti Dept. of Health ken ditoy a naikkan ti grado.
Inlawlawag na a ti karaman kadagiti inaramid da para iti nasalsalun-at a komunidad ket ti programa da a Regular Itaktak Mo, panagmula iti hardin, health and wellness para iti nasalun-at a bagi ken iti kada Sabado a clean-up drive da.
Kunana a tapno agtultuloy a nadalos ken nasalun-at ti barangay da ket kasapulan ti ordinansa seknan iti pnagdalos iti aglawlaw, pannaka-segregate dagiti basura, ken ti panangpapintas da pay ti Mini Park Urban Garden gapo ta makatulong daytoy kadagiti kalugaran da. Mainaig iti daytoy, dakkel a banag ti panagdaldalos para iti nasalun-at a barangay ken dagiti mismo a lumugar.
