LAOAG CITY – Nagdeklarar ti state of war alert ti militar ti Israel kalpasan ti panagatake ti Islamist militant group nga Hamas a nakasugatan ti agarop 500 a tattao ken nakatayan ti 40 nga Israelis.
Daytoy ti inwaragawag ni Israeli Prime Minister Benjamin Netanyahu.
Segun iti Israel Defense Forces, napagtignayen dagiti soldado da ken nagpanawagan kadagiti reservist nga agsagana nga ag-augment kas sungbat iti panagatake ti Hamas.
Basar iti Hamas, nangiyuswat daytoy ti 5,000 rockets kontra iti Israel iti operasyon nga inawagan na nga Al-Aqsa Storm target dagiti kalaban, erupuerto ken military positions.
Naamoan a dakkel pay a bilang dagiti militante manipod iti Gaza ti nakastreken iti teritoryo ti Israel isut gapuna a binallaagan ti Israel Defense Forces dagiti Israelis nga agnanaed iti asideg ti Gaza nga agtalinaed iti pagtaengan da.
Immunan a naireport manipod iti Israel rescue service nga adda ti maysa a lola a mapatta-patta nga agtawen ti 60 agpangato a natay iti rocket barrage.
Nag-convene metten ti Security Cabinet ti Israel iti Israel Defense Forces headquarters iti Tel Aviv.
Ti surprise rocket ken infiltration attacks ti Hamas iti Israel ket napasamak kalpasan ti maika-50 nga anibersaryo ti 1973 war a maysa a surprise attack ti kaparanget nga Arab country ti Israel a rimsua idi Oktubre 6, 1973.
Iti nagbalin a mensahe ni Muhammad Al-Deif, ti Hamas military commander, inpaganetget na a ti panagataken da iti Israel ket sungbat da iti panagatake kadagiti babbai, pananggasaw-gasaw ti Al-Aqsa mosque ken panangkubkub ti Gaza.
