LAOAG CITY – Inbutaktak ni Konsehal Bismark Angelo Quidang iti ciudad ti Batac a kaadoan kadagiti naala a benepisyaryo ti Sustainable Livelihood Program (SLP) ket saan a nagballaigi iti naipaay kadakuada a pagbiagan.
Segun ken ni Quidang, karaman kadagiti nanggundaway iti Sustainable Livelihood Program ket benepisyaryo iti Pantawid Pamilyang Pilipino Program iti ciudad ti Batac.
Inlawlawag ni Quidang nga adda ti naidasar a resolusyon iti konseho tapno maipaayan ti pammalubos ni Mayor Albert Chua a makipinnirma iti Memorandum of Agreement para iti iti Sustainable Livelihood Program ti Department of Social Welfare and Development (DSWD).
Kuna na a kas miembro iti City Advisory Council iti Pantawid Pamilya ket adda dagiti saludsud na tunggal adda taripnong da kas ti kaadda dagiti miembro ti Sustainable Livelihood Program a saan a nagballaigi wenno saanen a nangituloy iti naipaay kadakuada a pagbiagan da.
Inpalgak na a dinamag na no ania ti pudno a sitwasyon dagiti Sustainable Livelihood Program (SLP) ngem saan nga available ti rekord ti saludsud na isut gapuna a kiniddaw ni Konsehal Kishel Pungtilan iti Department of Social Welfare and Development ti rekord da maipanggep iti ipapaay da a livelihood program.
Ditoy a napaneknekan da nga iti inisyal a report ket addan ti nasurok a 75 a porsiento ti saanen nga aktibo iti nasao a programa.
Inpakaammo na a tapno malawlawagan da a naimbag ket nagimbitar da kadagiti maseknan a personalidad no sadinno a naamoan da a nagduduma ti rason no apay a saan a nagballaigi ken intuloy ti kaadoan a miembro ti naipaay kadakuada a pamastrekan da.
Inpetteng na a ti arigna saan da a maawat a sungbat ti dadduma a benepisyaryo iti programa ket insardeng dan ti naipaay kadakuada a pagbiagan manipod iti gobierno gapu ta saan dan a masango pay.
Inadmitir met ti Department of Social Welfare and Development nga ado dagiti nagbalin a problema ngem inkari da nga ad-adda pay a padur-asen ken pasayaaten da dagiti ipatpatungpal da a panagsanay sakbay nga ipaay da kadagiti benepisyaryo ti pamastrekan da, kasta met a paigetan da ti preparasyon ken panagmonitor da.
Nupay kasta, innayon ni Quidang a ti koma pay rumbeng a baliwan dagiti maala a benepisyaryo ti nasao a programa ket ti mindset da agsipud ta ti patien da a maysa a rason no apay a saan nga nga agballaigi dagitoy ket saan da nga ikkan ti naan-anay importansya gapu ta saan da a nagrigatan dagitoy.
