LAOAG CITY – Kalikagum ni Mr. Jahandar Shah Mariñas Mohammed, maysa kadagiti beach owner iti Brgy. Calayab ditoy siudad ti Laoag a maipasardeng ti panagoperar ti Sadiri Calayab Beach Resort gapu kadagiti maipagarup a sumagmamano a nalabsingda a pagannurutan.
Segun kenkuana, nadismaya daytoy kadagiti maseknan a pangopisinaan ken ahensia ti gobierno kalpasan nga arig awan pay ti tignayda kadagiti ipaspasada a dokumento a mangipaneknek nga adda ti nagsalungasingan ti nasao a beach resort.
Inbatadna nga iti City Assessor’s Office ket naduktalanna a nakailanad a public land ti Sadiri Calayab Beach Resort ngem full blown resort ti napasamak, iti Department of Environment and Natural Resources – Provincial Environment and Natural Resources Office ket nakaala isuna ti sertipikasion a mangipakita nga awan ti Environmental Compliance Certificate ti nasao a beach resort agpapan iti daytoy a gundaway.
Malaksid iti daytoy, inpalgakna a maibasar ken ni Engr. Gregory Bareng ket awan ti Zoning Clearance ti Sadiri Calayab Beach Resort ken awan pay ti building permit-na segun ken ni Engr. Roberto Adaya iti City Engineering Office.
Nupay kasta, masdaaw daytoy no apay agpapan iti daytoy a kanito ket nawaya nga agtultuloy iti operasion ti Sadiri Calayab Beach Resort iti baet nga inaldaw daytoy nga agturturong kadagiti maseknan nga opisina ken ahensia ti gobierno maipanggep iti daytoy a banag.
Inlawlawagna a maibasar iti pannakisarsaritana ken ni Ms. Antonette Bareng, ti mangidadaulo iti Business Process and Licensing Office ket naduktalanna a saan a rehistrado ti nasao a beach resort a mangipasimudaag nga awan ti lisensiada iti las-ud ti dua ket kagudua a tawen ken awan pay ti aplikasionda iti nadakamat nga opisina.
Gapu iti daytoy, mamati a saan nga agbaybayad ti Bureau of Internal Revenue taxes ti nasao a beach resort rason nga ikagkagumaanna a maimbestigar a naimbag dagitoy nga anomalya a mapaspasamak.
Mainaig iti daytoy, kunana nga adda pay ti inpasa ti Sadiri Calayab Beach Resort iti Business Process and Licensing Office a palso a dokumento rason a naisubli daytoy kadakuada.
Innayonna a nagsurat pay isuna iti opisina ni Mayor Michael Marcos Keon ngem awan pay ti nalawag a tignay maipapan iti daytoy a reklamona.
