LAOAG CITY – Naduktalan a ti ospital a nauram iti ciudad ti Delhi idiay India a nakatayan ti pito a maladaga ket awan ti valid license na.
Napasamak ti uram idi rabii ti sabado a nakatiliwan ti agtagikua iti ospital ken ti doktor a nakaduty, ken napilaan dagitoy ti culpable homicide.
Iti imbestigasyon dagiti otoridad ket naduktalan pay nga awan ti fire extinguishers ken emergency exit ti nadakamat nga ospital.
Inbatad ni Police commissioner Shahdara Surendra Chaudhary a ti NOC wenno No Objection Certificate ti nasao nga ospital ket nag-expired paylaeng idi Marso 31 ita a tawen.
Ti Fire No Objection Certificate nga isu ti mangsertipikar a ti maysa a pasdek a na-meet na ti fire safety standards ket maysa kadagiti kangrunaan a kasapulan dagiti ospital buildings idiay India.
Innayon ni Chaudhary a ti nasao nga ospital ket napalubusan laeng a maaddaan ti lima a beds ngem addaan daytoy ti 10 beds.
Maipalagip nga iti pannakapasamak ti uram ket adda ti 12 a kaipasngay a maladaga iti ospital ken lima kadagitoy ket agtultuloy a maag-agasan iti sabali nga ospital.
Mainaig iti daytoy, inmandar metten ti Delhi government ti pannakaiyuswat ti magisterial inquiry gapu iti napasamak.
