LAOAG CITY – Inpakaammo ni Maj. Bryan Albano, ti 501st Infantry “Valiant” Brigade iti Philippine Army a miembro ti Platoon Uno ti Ilocos Cordillera Regional Committee ti rebelde a grupo a nakaengkwentro ti Philippine Army iti Barangay Poblacion iti ili ti Nueva Era.
Segun kenkuana, adda ti narekobreda a dagiti taraon, hygiene kits, medical supplies ken dadduma pay iti nakapasamakan ti lugar.
Inbatadna a dagiti nasao a makakannigid a grupo ket aggapu iti probinsia ti Abra.
Inlawlawagna a ti kangrunaan nga ar-aramiden ti nasao a grupo ket agturturongda kadagiti lugar tapno agaramid ti riribok kas ti panagpatay ken panangdadael kadagiti lugan.
Kunana a saan nga agbaybayag dagiti rebelde a grupo iti maysa a lugar ngem siguradoenda nga agballigi ti planoda.
Innayonna nga agarup 15 agingga 20 nga indibidual ti nakarinnupak a grupo ti Philippine Army.
Maipalagip a nagpaot ti engkwentro iti nagbaetan ti Philippine Army ken dagiti kameng ti New People’s Army iti uneg ti 15 a minuto.
