LAOAG CITY – Nagbinnara iti presscon dagiti boksingero nga isuda Chris Eubank Jr. ken Conor Benn.
iti naiyuswat a presscon iti Manchester ket kellaat lattan a minalo ni Eubank ni Benn ti itlog kabayatan ti panagsangoda.
Ti nasao a laban ket naiwayat koma idi 2022 ngem rimmuar a nagpositibo ti agtawen ti 28 a ni Benn iti maipawil ti substance a clomifene isu a napatawan ti ban.
Idi 2023 idi inruar ti WBC ti finding ken rimmuar a gapu iti nalabes a pannangan ni Benn ti itlog ti maikagapu.
Maisayangkat ti laban da Benn ken ti agtawen ti 35 a ni Eubank Jr. inton Abril 26 iti Tottenham Hotspur Stadium.
Addaan ti 32 a panangabak, dua a pannakaabak ken 23 a knockouts ni Eubank Jr. idinto a ni Benn ket addaan ti 20 a panangabak, awan pay ti abakna ken 13 a knockouts.
Idi 1990 idi nagsango dagiti amada nga isuda Chris Eubank Sr. ken Nigel Benn.
Nangabak ni Eubank Sr. idi 1990 idinto a nagbalin a draw ti maikadua a labanda idi 1993.
