LAOAG CITY – Bimmagsak iti P8 iti kada kilo ti farmgate price ti kamatis kabayatan nga adda iti katengngaan ti harvest season, basar iti monitoring ti Samahang Industriya ng Agrikultura (SINAG).
Daytoy ket maysa a bulan laeng sipod idi dimmanon iti P350 iti kada kilo ti retail price daytoy.
Inbatad ni Samahang Industriya ng Agrikultura Executive Director Jayson Cainglet, lugi dagiti mannalon gapu iti nasao a presio idinto a kaaduan kadakuada ket ad-adda a pinilida ti saanen nga agmula.
Inpetteng ni Cainglet, nangatngato ti magastos no agmula maidasig iti mabalin a mapastrek no ilako dagitoy.
Naammoan nga uray awan ti reklamo manipud kadagiti konsyumer no nababa ti presio ti kamatis kadagiti merkado, nakaro met ti pannakalugi dagiti mannalon nga isuda ti kangrunaan a maap-apektaran ti nababa a farmgate price.
Basar iti monitoring ti Department of Agriculture (DA) kadagiti merkado idiay Metro Manila, ti retail price ti kamatis ket agay-ayam laeng ti P35 agingga iti P70 iti kada kilo.
