LAOAG CITY – Nangipadanon ti suporta ti European leaders ken ni Ukraine President Volodymyr Zelensky kalpasan ti nabara a panagsinnungbat iti pannakitaripnongna ken ni United States President Donald Trump iti Oval office.
Karaman kadagiti nangipeksa ti suportana ni European Union chiefs Ursula von der Leyen ken Antonio Costa nga inpasingkedda ken ni Zelensky a saan daytoy nga agmaymaysa.
Iti joint statement, binagaan ti dua a lider ni Zelensky nga agbalin a natured ken inpasiguradoda nga agtultuloy ti pannakitinnulongda para iti kinakappia.
Inpetteng met ni French President Emmanuel Macron a ti Russia ti aggressor iti gubat iti Ukraine ken ti Ukraine ti ad-adda a naapektaran.
Nagkari daytoy ti tulong iti Ukraine ken sanction met para iti Russia iti uneg ti tallo a tawen ken itultuloyda pay daytoy.
Inbatad ni Macron no adda man ti agsugsugal para iti World War III, daytoy ket ni Russian President Vladimir Putin. Dinakamat ti French President ti akusasion ni Trump ken ni Zelensky.
Nangipeksa ti suporta ni outgoing Germany chancellor Olaf Scholz para iti Ukraine pakairamanan ti dadduma pay a world leaders manipud iti Netherlands, Poland, Spain, United Kingdom, Canada, Denmark ken Sweden.
Iti biang met ti Russia nga isu ti nangirubuat ti full scale invasion iti Ukraine, inbatad ni Russian Security council deputy chairman Dmitry Medvedev nga iti umuna a gundaway ket inrakurak ni Trump ti kinapudno iti rupa ni Zelensky nga inawaganna a “cocaine clown.”
Kabayatanna, nagpanawagan ni Italian Prime Minister Giorgia Meloni idiay Estados Unidos, Europa ken dagiti kaalyadona a mangisayangkat ti Summit nga awan ti pannakaitantanna tapno talantanen ti gubat iti Ukraine.
