LAOAG CITY – Mamati ti Department of Health nga adda ti epekto ticlimate change iti nasapa a panagngato ti kaso ti dengue ita a tawen.
Segun ken ni Department of Health spokesperson ken Assistant Secretary Albert Domingo, nasapsapa a nangrugi ti panagtudo na iti pagilian gapu kadagiti weather patterns kas ti shearline, Intertropical Convergence Zone ken easterlies a naipagagangay a mapaspasaran tunggal bolan iti Hunyo ken Hulyo.
Naamoan a sumagmamano a lugar iti Metro Manila ti nagdeklarar ti dengue outbreak iti kallabes, ngem in-inoten a bumabbaba ti bilang ti mairekrekord a baro a kaso.
Inpakaammo ti Department of Health a nababbaba ti mortality rate ti sakit ita a 2025, nga adda iti 0.36% laeng no ikumpara iti 0.43% iti isu metlaeng a panawen idi 2024.
Kayatna a sawen daytoy ket iti kada sangaribo a pasyente ket tallo agingga iti uppat laeng ti matmatay.
Iti baet daytoy, nagpalagip manen ti ahensya a saan a rumbeng nga agkampante ti publiko gapu ta mabalin a ngumato manen ti kaso ti dengue no saan nga itultuloy ti panagdaldalos ken dadduma pay a panagannad.
Binalakadan pay ti ahensya ti publiko a mapan agpakita a dagus iti doktor no makapasar ti sintomas ti dengue tapno saan a kumaro ti kondisyon.
